Өскемендегі Лев Гумилев атындағы №38 гимназияның оқушылары жылда үздіктер қатарынан табыла біледі. Биыл да солай, деп хабарлайды F16.kz.
Ағымдағы жылы аталмыш білім ордасын 48 оқушы тәмамдаса, оның бесеуі «Алтын белгі», сегізі «Үздік аттестат» иегері атаныпты. Бұл туралы бүгін гимназия аумағында өткен түлектердің мектеп бітіру кешінде белгілі болды. Салтанатты іс-шараға Өскемен қаласының әкімі Алмат Ақышов қатысып, үлкен өмірге қадам басқалы тұрған ұл-қыздарға ақ жол тіледі.
– Сіздер ертеңгі ел тұтқасын ұстар азаматсыздар. Өздеріңізге артылар сенім мен үміт зор. Барлығыңыздың тәуелсіз еліміздің өсіп-өркендеуіне үлес қосар, даңқын асқақтатар азамат болуыңызға тілектеспін! Жаңа өмірге басқан қадамдарыңызға ақ жол, сәт сапар тілеймін! – деп ізгі лебізін білдірген қала әкімі бұдан соң түлектерге салтанатты түрде аттестат табыстады.
Қала басшысының қолынан аттестат алған сондай түлектің бірі Айдана Насимолда болды. Ол бүгін өміріндегі ұмытылмас сәттердің бірі болғанын айтып, толқынысын жасыра алмады.
– Әрине, туғаныңдай болып кеткен құрбыларыңмен, мұғалімдермен қоштасу оңай емес. Дегенмен, біз гимназиямыздан алшақтап кетпеспіз деп ойлаймын. Өміріміздің жаңа кезеңіне қадам бассақ та, өткенімізді ұмытпай, анда-санда мектебімізге келіп, мұғалімдерімізбен қауышып тұратын боламыз. Мен өзім өмірімді осы қала, Өскеменмен байланыстырғым келеді. Осы жерде жоғары білім алып, туған өлкемнің игілігіне еңбек етуді жоспарлап отырмын, – дейді Айдана.
Айта кетейік, өткен ғасырдың 60-шы жылдары іргесі қаланған гимназия бүгінде Өскемен мен Шығыс Қазақстандағы алдыңғы қатарлы білім ордаларының бірінен саналады. Гимназия ағылшын тілін тереңдетіп оқытуымен ерекшеленеді. Жалпы, мұндағы оқушылар төменгі сыныптардан бастап қазақ, орыс және ағылшын тілдерін қатар меңгереді. Сондықтан білім алушыларға қойылар талап жоғары, дейді гимназия басшылығы.
– Біз гуманитарлық пәндерге басымдық береміз. Аптасына кем дегенде бес-алты сағатты ағылшын тіліне арнаймыз. Соның арқасында шәкірттеріміз талай республикалық және халықаралық білім сайысында топ жарып жүр. Жалпы, осы күнге дейін 50-ден астам түлегіміз АҚШ-та білім алғанын ерекше атап өткім келеді. Және олардың дені кейін елге оралып, туған жерінің игілігіне қызмет ете бастады. Бұған қоса, біз жыл сайын оқушыларымызға арналған Ұлыбританияға сапарлар ұйымдастырамыз, – дейді гимназия директоры Галина Парубова.
Ол, сонымен қатар мектеп түлектері Ұлттық бірыңғай тестілеуден орта есеппен 85-90 балл жинайтынын ерекше атап өтті.
