Өскемендік дәрігерлер инсульт алған 19 жастағы қыздың өмірін сақтап қалды. Оның ми тамырына ұйып қалған қанды (тромб) мамандар алып тастады. Күрделі ота сәтті өтті, деп хабарлайды F16.kz.
Шұғыл ишемиялық инсульт жағдайында 19 жастағы науқасқа Шығыс Қазақстан облыстық мамандандырылған медициналық орталығында (ШҚО ММО) тромбоэкстракция отасы жасалды.
Жедел жәрдем бригадасы қабылдау бөліміне жедел неврологиялық белгілері бар қызды жеткізді. Оның бойында бас айналу, құсу, оң жақ қол-аяқтың әлсіздігі, сөйлеу бұзылысы және бет асимметриясы белгілері болды. Тексеру барысында дәрігерлер ангиографиялық бақылау арқылы оның сол жақ ортаңғы ми артериясының бітелгенін анықтады.
Тамырдан ұйыған қанды алу операциясын жоғары санатты нейрохирург-дәрігер Дмитрий Недбайло мен резидент-дәрігер Рауан Қылышбеков жүргізді. Дер кезінде жасалған ота мен жоғары технологиялық жабдықты қолданудың арқасында науқастың қан айналымы қалпына келтірілді, ал бірнеше сағаттан кейін-ақ жағдайы айтарлықтай жақсарды.
Емдеу барысында неврологиялық тапшылық толық жойылды. Қыз инсульт бөлімінен шығарылды.
