Алматыда тұрғындар «пайызсыз үй алуға» уәде берген қаржы пирамидасына алданып, 50 млн теңге көлемінде ақшасынан айырылды, деп хабарлайды F16.kz.
Қаржылық мониторинг агенттігі баспасөз қызметі таратқан ақпаратқа сүйенсек, Алматыда «UILI BOLAYIK» қаржы пирамидасының қызметі тоқтатылды. Бұл жоба әлеуметтік тұрғын үй бағдарламасы ретінде ұсынылып, адамдарды жылжымайтын мүлікті пайызсыз бөліп төлеу арқылы алуға болатынына сендірген.
Қатысушыларға ай сайын 15-30% көлемінде табыс және жаңадан тартылған адамдар үшін 10% бонус ұсынылған. Бірақ жиналған қаржы ұйымдастырушылардың жеке банктік шоттарына аударылып отырған, ал заңды тұлға ретінде көрсетілген «UILI BOLAYIK» қайырымдылық қорының» есепшоттары пайдаланылмаған, – деді ҚМА Аоматы қаласы бойынша департаменті.
ҚМА дерегінше, жиыны 515 адам аталған пирамидаға ақша салып, жалпы сомасы 50 миллион теңгеден астам шығынға ұшыраған. Қазір тергеу жалғасып жатыр, сот санкциясымен күдіктінің есепшоттарына және елден шығуына тыйым салынған.
Қазақстан Республикасы Қылмыстық-процестік кодексінің 201-бабына сәйкес өзге ақпарат жариялауға жатпайды.
