Ақмола облысы Атбасар ауданының екі ауылы сібір жарасына байланысты карантинге жабылды. Бұл туралы ауыл шаруашылығы министрі Айдарбек Сапаров мәлім етті, деп хабарлайды F16.kz.
Биылғы маусым айының соңында денсаулық сақтау министрі Ақмарал Әлназарова Атбасар ауданында бірнеше адам сібір жарасын жұқтырғанын мәлім еткен. Ол кезде науқастардың жағдайы орташа ауыр деп бағаланып, тиісті ем-дом алып жатқаны хабарланған. Сонымен қатар аталған елді мекендерде эпидемияға қарсы шаралар жүргізілгені айтылған.
Енді қазір ауыл шаруашылығы министрі Айдарбек Сапаров сібір жарасы анықталған ауылдарда шектеу енгізілгенін жеткізді. Барлығы 19 адамнан сынама алынған: олардың жетеуінде сібір жарасы расталып, қалған 12-сінде — теріс нәтиже көрсеткен.
Мал мен адамдардың қозғалысына тыйым салынды, ол жаққа кіруге рұқсат жоқ. Біз шлагбаум орнаттық. Республикалық індетке қарсы жасақ дезинфекция, өңдеу, залалсыздандыру жұмыстарын жүргізді. Зертхана қорытындысын алғаннан кейін 1 шілдеде бірден карантин енгіздік, — деді Сапаров.
Оның айтуынша, карантин 15 күнге созылады. Осыдан кейін жаңа сынамалар алынып, сібір жарасы расталмаса шектеулер алынады.
