Шығыс Қазақстан облысында алдағы бес жылда тауарлы балық өндірудің жылдық көлемін 9 774 тоннаға дейін жеткізу көзделіп отыр. Бұл туралы табиғи ресурстар және табиғат пайдалануды реттеу басқармасы басшысының орынбасары Мерхат Әміров мәлім етті, деп хабарлайды F16.kz.
Оның ішінде 8 578 тоннасы – албырт, 1 151 тоннасы – тұқы, ал 45 тоннасы – бекіре тұқымдас балықтар болмақ.
Былтыр облыс кәсіпорындары 1 866 тонна тауарлы балық өсірді. Биылғы жоспар – 2 302 тонна. Негізгі өндірушілер: «Шығыс универсал» ЖШС, «Гранд фиш», «Алтайская форель» және «OstFish» компаниялары. Бұл кәсіпорындарда өндіріс қазіргі заман талабына сай жүргізіледі.
2030 жылға қарай салаға шамамен 15 мың тонна жем мен 16 млн дана балық шабағы қажет болады. Қазір облыста шабақ пен дернәсіл өндіру жолға қойылған. Былтырдың өзінде 75 млн дана сиг тұқымдас балықтың дернәсілі, 600 мың форель шабағы және 6,8 млн дана тұқы тәрізді балық шабағы өндірілді, – деді Мерхат Әміров.
Субсидиялау жүйесі де дамып келеді. Былтыр аквакәсіпорындарға жем мен отырғызу материалына 449 млн теңге көлемінде қолдау көрсетілді. Биылғы алғашқы жартыжылдықта балық шаруашылығы өнімділігі мен сапасын арттыру, сондай-ақ селекциялық балық өсіруді дамыту мақсатында 130 млн теңге бөлінді.
Өңірде кәсіпшілік балық аулаумен 16 кәсіпорын айналысады, олардың негізгі бөлігі Зайсан көлі мен Бұқтырма су қоймасында жұмыс істейді. Мұнда жалпы көлемнің 98%-ы ауланады. 2025 жылға кәсіпшілік аулау лимиті 6,7 мың тонна болды.
Су айдындарын балықтандыруға да айрықша көңіл бөлінген. Соңғы бес жылда балықтандыру көлемі 2,5 есеге артып, 18,3 млн данадан 44,6 млн-ға жетті. Былтыр өңірдің су айдындарына 44 млн-нан астам шабақ жіберілді.
Балық өңдеумен өңірде 11 кәсіпорын айналысады, оның ішінде «Төре Тоғам» және «Zaisan-Balyq» ЖШС Еуропалық одаққа экспорттау құқығына ие.
Былтыр Шығыс Қазақстанда 5,5 мың тонна балық өнімі өндірілді. Өңірдің өңдеу қуаттылығы жылына 28,8 мың тоннаға дейін жетеді.
Осылайша облыста балық өсіру, өңдеу және көбейту бойынша бизнес пен мемлекет бірлесіп жұмыс істейтін тұрақты кластер қалыптасты.
