Күршім ауылындағы айналма жолдың құрылыс жұмыстары қызып тұр. Қазір аудан орталығының сыртымен өтетін жол құрылысына 10-нан астам техника, 30-ға жуық адам тартылған, деп хабарлайды F16.kz тілшісі.
КӨПІРДЕН КЕЙІНГІ ІРІ ЖОБА
Бас-аяғы 12 шақырымға жететін айналма жолдың құрылысы – соңғы жылдары Күршім ауданында көпірден кейін қолға алынған ең ірі инфрақұрылымдық жоба деуге болады.
Жоба аудан орталығы ішіндегі көлік қозғалысын едәуір жеңілдетіп, жолдағы қауіпсіздік деңгейін арттырмақ. Құрылыс жұмыстары 2024 жылдың күзінде басталып, 2026 жылдың күзінде аяқталады деп жоспарланған.
– Биыл жоспарға сәйкес, жолдың төменгі қабатын төсеу, тегістеу жұмыстарын аяқтауға тиіспіз. Келер жылы үстінен екі қабат асфальт төселеді. Жол екі жолақты болады, ал жүретін бөлігі мен жиегін қоса есептегендегі жалпы ені 10 метрге жетеді. Жол бойында бір құбыр болады. Жалпы алғанда, құрылыс жұмыстары кестеге сай жүріп жатыр. Жұмыс күші жеткілікті, – дейді «ОблШығысЖол» ЖШС №5 өндірістік жол учаскесінің бастығы Бағлан Ұябаев.
Жоғарыда жазғанымыздай, жоба аясындағы жұмыстар келер жылы аяқталады деп жоспарланып отыр. Дәлірек айтсақ, Күршім ауылын айналып өтетін жол 2026 жылдың қыркүйек-қазан айларында пайдалануға берілуге тиіс. Осы ретте жоба құны 3 миллиард 412 миллион теңге болатынын да айтқан жөн.
БАСҚА ЖОЛДАР ДА НАЗАРДАН ТЫС ҚАЛМАЙДЫ
Аудан әкімдігінен хабарлағандай, 2025 жылы өңірде жол жөндеу жұмыстары мұнымен шектеліп қалмақ емес. Мәселен, ауылішілік жолдарға келер болсақ, биыл Алғабас ауылындағы Ибежанов, Күршім ауылындағы Шәкәрім, Зангин, Уражанов көшелерінің жолдарына орташа жөндеу жұмыстары жүргізілуде.
Бұдан бөлек, облыстық жолаушылар көлігі және автомобиль жолдары басқармасына қаражат бөлу үшін бірнеше бюджеттік өтінім жолданған. Олардың арасында Сарыөлең мен Топтерек ауылдарындағы көшелердің жолдарын қалпына келтіруге қатысты жобалар бар.
Белгілі болғандай, 2025 жылы жалпы ұзындығы 134,4 шақырымға жететін аудандық маңызы бар жолдарды күтіп ұстауға 213 миллион теңге қарастырылған.
