Шығыс Қазақстан облысының әкімі Нұрымбет Сақтағанов Чех Республикасы Парламенті депутаттар палатасының Вице-спикері Ян Бартошекпен және Чехиядан келеген делегациямен іскерлік кездесу өткізді, деп хабарлайды F16.kz.
Кездесу барысында Шығыс Қазақстан мен Чехия арасындағы ынтымақтастық байланыс талқыланды. Бүгінде өңірден Чехияға металл, жануарлар мен өсімдік тектес өнімдер және азық-түлік экспортталады.
Ал, импорт бойынша Чехиядан Шығыс Қазақстанға химия өнеркәсібінің өнімдері, оның ішінде резеңке мен пластмасса, ағаш, орман материалдары мен целлюлоза-қағаз өнімдері, тоқыма бұйымдары, құрылыс материалдары, металл өнімдері, машина, жабдықтар, көлік құралдары, аспаптар мен аппараттар, азық-түлік тауарлары жеткізіледі.
Сонымен қатар бүгінде мәдени-гуманитарлық, білім беру және туристік байланыстар белсенді дамып келеді. Десе де, Чехиядан келген делегация ынтымақтастықты одан әрі күшейтуге ниетті. Әсіресе, машина жасау, энергетика, ауыл шаруашылығы, көлік, фармацевтика салаларына қызығушылық артып отыр.
Облыс әкімі ынтымақтастықтың перспективалы бағыттарының ішінде инвестициялық саясат пен туризмді де атап өтті. 2005 жылдан бері Чехиядан Қазақстанға тікелей инвестициялардың жалпы ағыны 354,5 млн АҚШ долларын құрады.
Сіздерді қыркүйек айында Өскемен қаласында өтетін «Altai Invest – 2025» халықаралық инвестициялық форумына қатысуға шақырамын, — деді ШҚО әкімі.
Осы орайда айта кету керек, қазіргі таңда Екінші дүниежүзілік соғыс жылдарында қазіргі Чехия аумағында қаза тапқан қазақстандықтар, сондай-ақ Қазақстан аумағында жерленген чех азаматтары туралы ақпаратты іздеу, зерттеу және қалпына келтіру жұмыстары жүргізіліп жатыр.
