Абай облысында 200-ге жуық мектеп қызметкерінің жеке дерегі тарап кеткен. Бұл туралы облыстық прокуратураның баспасөз қызметі мәлім етті, деп хабарлайды F16.kz.
Бородулиха ауданының прокуратурасы үш орта мектептің 194 қызметкерінің жеке мәліметтері тарап кеткенін анықтады. Бұл заңбұзушылық мемлекеттік сатып алулар порталына мониторинг жүргізу барысында белгілі болды.
Білім беру мекемелері мемлекеттік сатып алу бойынша медициналық тексеруден өту үшін қызметкерлердің тізімін жариялаған, онда барлық қызметкердің жеке мәліметі, оның ішінде толық анкеталық мәлімет, ЖСН және басқа да ақпарат көрсетілген.
Қолданыстағы заңнамаға сәйкес, мұндай мәлімет міндетті түрде қорғалуға тиіс. Шектеулі қолжетімді ақпаратқа қол жеткізген тұлғалар оның құпиялығын қамтамасыз етуге міндетті және мәлімет иесінің келісімінсіз немесе заңды негіз жоқ жағдайда жеке ақпаратты таратуға құқылы емес.
Мектеп басшылығының бұл талаптарды сақтамауы жеке мәліметтің заңсыз мақсатта пайдаланылу қаупін туғызды.
Тексеру қорытындысы бойынша аудан прокуратурасы мектеп директорларын Әкімшілік құқық бұзушылықтар туралы кодекстің 79-бабы 2-бөлігі бойынша әкімшілік жауапкершілікке тартып, 1 миллион теңгеден астам айыппұл салды, сондай-ақ олар тәртіптік жазаға тартылды.
Қазір аудандық білім бөлімі болашақта ұқсас бұзушылықтардың алдын алу мақсатында шаралар қабылдаған.
