ШҚО әкімі Нұрымбет Сақтағанов егін алқаптарында шегірткеге қарсы мониторинг пен тексеру жүргізуді тапсырды, деп хабарлайды F16.kz.
Облыстық ауыл шаруашылығы басқармасының басшысы әкімдік отырысындағы баяндамасында Самардағы үш мың гектар жерді шегіртке басқанын атап өтті.
22-23 маусым күндері Абай облысының Көкпекті ауданынан шегіртке ұшып келді. Олар Самар ауданының үш мың гектар жеріне қонып, қауіп төндірді. Осыған орай біз жедел түрде Ауыл шаруашылығы министрлігімен, салалық комитетпен және мемлекеттік инспекциямен бірлесіп, қосымша дәрі-дәрмек (пестицид) жеткіздік. Өңдеу жұмыстары дер кезінде жүргізілді, — деді басқармасының басшысы Ажар Қажыбекова.
Айта кету керек, биыл өңірде шегірткенің итальяндық прус пен азиялық түрлері көп таралғаны белгілі болды. Бірақ химиялық өңдеу жұмыстары тұрақты жүргізіліп отыр.
Облыстық ауыл шаруашылығы басқармасы қажет болса тиісті қорғаныс құралдарын да қолданатынын айтады.
Барлық жоспарланған мониторинг пен тексерулерді толық көлемде жүргізіп, сондай-ақ көршілес мемлекеттермен бірлескен карантиндік жұмысты күшейту қажет, – деп тапсырды облыс әкімі.
Биыл ең белсенді ошақтар Зайсан, Күршім, Тарбағатай және Самар аудандарында тіркелген.
