Ұлан ауданының Асубұлақ кентінде Ұлы Жеңістің 80 жылдығы мен Қазақстан Республикасы Конституциясының 30 жылдығы аясында Халық қаһарманы, ержүрек партизан, көрнекті жазушы Қасым Қайсеновті еске алуға арналған қазақ күресінен халықаралық турнир өтті, деп хабарлайды F16.kz.
Балуандар бәсекесіне жиыны 200-ге жуық жас балуан жиылды. Оның ішінде атап айтсақ, көршілес Моңғолия мен Ресей Федерациясынан, сондай-ақ еліміздің Ақмола, Абай облыстарынан, Астана, Алматы, Шымкент, Павлодар және Жетісу қалаларынан келген спортшылар қатысып, өзара күш сынасты.
Бұл – ұлттық спортты дәріптеумен қатар жас буынды батырлыққа, төзімділікке және рухани бай болуға тәрбиелейтін айтулы дода. Турнир ерлік пен намыстың, достық пен бірліктің жарқын көрінісі болды.
Аталған шара Асубұлақ ауылының әкімі Қуаныш Құмарұлының және осы ауылдың тумасы, Қазақстан Қазақ күресі федерациясының төрағасы Қайрат Мазкеновтің бастамасымен ұйымдастырылды. Турнирге Қазақ күресі федерациясының президенті Базарбай Оразбек арнайы қатысты. Жарысқа «Kазцинк» ЖШС демеушілік көрсетті.
