Филиппиндегі Кесон-Сити қаласында өткен биологиядан халықаралық олимпиадада (IBO – 2025) Өскемендегі Назарбаев зияткерлік мектебінің 11-сынып оқушысы Батыр Ержанұлы қола медаль иеленді, деп хабарлайды F16.kz.
Дүниежүзінің 80 елінен 300-ге жуық оқушы қатысқан бұл беделді жарыс биология бағытындағы ең үздік зияткерлерді анықтау мақсатында өткізіліп отырғанын айта кету керек. Олимпиада теориялық және практикалық турлардан тұрды. Қатысушылар молекулалық және жасушалық биология, физиология, генетика, экология, эволюция сынды күрделі бағыттар бойынша білімдерін сынады.
Батыр Ержанұлы — еліміздің биология пәні бойынша олимпиадалық команда үздіктерінің бірі. Бұған дейін ол республикалық пәндік олимпиадалардың бірнеше дүркін жүлдегері атанып, халықаралық деңгейдегі iGEM биоинженерия байқауына қатысып, командалық жобасымен көзге түскен.
Бұл жетістік — Батырдың табандылығы мен терең білімінің нәтижесі, оның халықаралық деңгейдегі табысы жас буынға жаңа белестерге ұмтылуға шабыт береді.
