Шығысқазақстандық полицей баланы судан құтқарып қалды, деп хабарлайды F16.kz тілшісі Polisia.kz сайтына сілтеме жасап.
Оқиға Абай облысында, Алакөл жағалауында болған. Отбасымен демалып жүрген алты жастағы бала ұзын арқан арқылы жағаға байланған судағы үрлемелі аттракцион – аквазорбқа мініп, ойнағысы келген. Ұйымдастырушылар арқанды баланың атасына ұстатып кеткен. Алайда кенеттен соққан қатты жел арқанды үзіп әкетіп, баланы судың тереңіне ала жөнелген.
Осы сәтте көл жағасында отбасымен бірге демалып жүрген Шығыс Қазақстан облысы Полиция департаменті жылдам қимылдайтын арнайы жасағының қызметкері Талғат Оспанов жағдайды көріп, дереу көмекке асыққан. Ол жағдайдың қауіпті екенін аңғарып, ойланбастан суға секірген. Желдің әсерінен едәуір алыс жерге кетіп қалған аквазорбты қуып жетіп, балаға алғашқы көмек көрсеткен. Артынан баланың атасы мен әкесі де көмекке келген. Бірлескен іс-әрекеттің арқасында бала жағаға аман-есен жетті.
– Біздің отбасымыз Талғат Сұлтанұлын мүлде танымайды. Ол да бізді білмейді. Соған қарамастан, қиын сәтте дәл осы кісі бірінші болып көмекке келді. Ұлымды толқын мен жел біртіндеп алысқа алып кетіп бара жатты. Егер Талғат Сұлтанұлы болмаса, жағдай басқаша аяқталуы мүмкін еді. Біз бұл кісіге өмір бойы алғыс айтып өтеміз, – дейді баланың анасы.
Полиция майоры Талғат Оспанов бұл әрекетімен құқық қорғау органдарының қызметкері үшін кәсіби борыш пен адамгершілік қасиеттің демалыс пен жұмыс уақытына бөлінбейтінін тағы бір мәрте дәлелдеді. Ол – әрдайым көмекке дайын азамат, нағыз тәртіп сақшысы.
