Өскемен қаласының әкімі Алмат Ақышов аппараттық кеңес өткізіп, қаладағы өзекті мәселелерге тоқталды, деп хабарлайды F16.kz.
Кеңес барысында жауапты мекемелерге қала көшелеріндегі жарықтандыру жағдайына қатысты толық есеп дайындау тапсырылды.
Әлеуметтік желіде тұрғындар абаттандыру, жарықтандыру мен қауіпсіздікке қатысты жиі сын айтатынын байқаймын. Сондықтан барлығына талдау жасаңыздар. Бұл жұмыстарға аумақтық басқару орталықтары да тартылады. Әр орталық өзіне тиесілі шағын аудан мен көшелерді аралап, қай жерде жарықтандыру мәселесі шешілмегенін нақтылап, маған есеп беріңіздер, — деді қала әкімі.
Естеріңізге сала кетейік, 24 шілде күні Өскемендені Тоғас көшесінде 11 жастағы баланы көлік қағып кетті. Оқиға әлеуметтік желіде кеңінен талқыланып, тұрғындар аталған көшеде жарықтандыру орнатылғанымен, мүлде қосылмайтынын жарыса жазды.
Ертеңінде қала әкімдігі болған жағдайға байланысты пікір білдіріп, Тоғас көшесіндегі жарықтандыру қалпына келтірілді.
Қазір бала әлі де ауруханада жатыр, жағдайы ауыр.
