«Сәулетай» саябағында әткеншектен құлап көз жұмған баланың ісі облыстық кәмелетке толмағандар істері жөніндегі мамандандырылған ауданаралық сотында қаралды, деп хабарлайды F16.kz.
Естеріңізге сала кетейік, қайғылы оқиға былтыр 11 шілде күні Өскеменде болған. Қала тұрғыны өзінің кәмелетке толмаған балаларын ұзартылған күн тобына әкелген. Ал, ондағы тәрбиешілер бүлдіршіндерді келісімшартсыз қабылдап, жауапкершілік алған. Артынша 6-10 жас аралығындағы 27 баланы сеуендеу үшін «Сәулетай» саябағына алып барады. Үлкендердің қарауынсыз қалған тәрбиеленушілердің бірі мүмкіндігі шектеулі балаларға арналған әткеншектен құлап, дене жарақатын алған. Бала алған дене жарақаты салдарынан медициналық мекемеде көз жұмды.
ҚР ҚК 141-бабының 2-бөлігі (балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау) бойынша азаматтар В. мен Д.-ға қатысты қылмыстық істі қаралды. Сот отырысында прокурор айыпталушыларға 2 жыл 6 ай мерзімге бас бостандығынан айыру жазасын, сондай-ақ 3 жыл мерзімге педагогикалық және кәмелетке толмағандармен жұмыс істеуге байланысты лауазымдарды атқару құқығынан айыруды және «Қазақстан Республикасы Конституциясының отыз жылдығына байланысты жарияланғанрақышылық туралы» Заң негізінде жазадан босатуды ұсынған. Ал, айыпталушылар өз кінәсін мойындамай, қайғылы оқиғаның кездейсоқ болғанын айтып, ақтау үкімін шығаруды сұрады, — дейді соттың баспасөз қызметі.
Сот айыпталушылардың кәмелетке толмаған балаларының барын жазаны жеңілдететін мән-жай ретінде таныды. Осылайша В. мен Д.-ны кінәлі деп танып, қылмыстық құқық бұзушылықтың қоғамдық қауіптілік дәрежесін және айыпталушылардың жеке басын ескере отырып, 2 жыл мерзімге бас бостандығынан айыру, сондай-ақ 2 жыл мерзімге педагогикалық және кәмелетке толмағандармен жұмыс істеуге байланысты лауазымдарды атқару құқығынан айыру жазасын тағайындады. Сонымен қатар, «Қазақстан Республикасы Конституциясының отыз жылдығына байланысты рақымшылық туралы» Заңының 2-бабы 1-тармағының 1, 4 тармақшаларына сәйкес олар негізгі жазадан босатылды.
Азаматтық талап ішінара қанағаттандырылды. Үкім заңды күшіне енген жоқ.
