Елімізде 1 тамыздан дәстүрлі «Мектепке жол» қайырымдылық акциясы басталды. Бір ай бойына жалғасатын игілікті шара аясында аз қамтылған, көпбалалы отбасылардан шыққан, жетім және ата-ана қамқорлығынсыз қалған балалар мектепке қажетті оқу құралдарымен, киімдермен қамтылады, деп хабарлайды F16.kz.
Акция аясында мектеп формасы, аяқ киім және кеңсе тауарларын сатып алуға көмек көрсетіледі. Шығыс Қазақстан облыстық білім басқармасы басшысының міндетін атқарушы Жанғазы Әліпбаевтың айтуынша, биыл өңірде 98 мыңнан астам оқушы мектепке барады, оның ішінде 20 мыңнан астамы «Всеобуч» бағдарламасы бойынша қолдауға ие болады. Бұл мақсатқа облыстық бюджеттен 7,2 млрд теңге бөлінді, соның ішінде 948,5 млн теңге – мектеп формасы мен аяқ киімге арналған.
Былтыр меценаттардың көмегімен 3100-ден астам балаға 37,9 млн теңгенің көмегі көрсетілді. Биыл 600-ден астам демеуші 4000-нан астам балаға қолдау білдіруге дайын.
Сонымен қатар 30 қыркүйекке дейін мектепке себепсіз бармай жүрген балаларды анықтау мақсатында рейдтер жүргізіледі. Акцияға қатысты сұрақтар бойынша білім басқармасының сенім телефонына хабарласуға болады: 70-18-28.
Сондай-ақ «Dauletten» қайырымдылық қоры шалғай ауылдардағы бастауыш сынып оқушыларына қолдау көрсететін «Ауылдағы ағайынның балаларына» жобасы арқылы акцияға жыл сайын атсалысып келеді.
