Өскеменнің Үлбі көпірі тағы да бүлінді. Инженерлік құрылымды құрсаулап тұрған деформациялық жік ажырап кеткен. Маңызды нысанға жауапты «Таза Өскемен» кәсіпорны мамандарының айтуынша, бұл ақау көліктер легінің шектен тыс көп болуынан туындаған, деп хабарлайды F16.kz.
Әлеуметтік желі қолданушылары қаладағы Үлбі өзенінің үстінен түскен басқа көпірлерде де жағдай мәз емес екенін жарыса жазды.
Үлбінің үстінен салынған барлық көпірдегі жағдай осы. Крылова мен Астана көшелерін жалғайтын көпірдің оң қапталындағы төртінші жікте, Мызы көшесі мен Шәкәрім даңғылын байланыстырған көпірдің оң жақ жолағында дәл осындай ақаулар бар. Мәшінмен жүріп келе жатып құрсаудың түйіскен тұсынан өткенде темірдің үйкенген дыбысы естіледі, – деп жазды қала тұрғындары әлеуметтік желіде.
«Таза Өскемен» коммуналдық кәсіпорнының мәлімдеуінше, деформациялық жіктер – жай ғана тақталар емес, ол болат элементтерден, серіппелер мен бағыттаушы механизмдерден тұратын күрделі инженерлік құрылғы. Ол жаздың аптап ыстығында және қыстың қақаған аязында көпірдің металл құрылысының өзгеріске ұшырауын реттеп тұрады. Сондай-ақ көліктер жүктемесі артқан кезде пайда болатын тербеліс пен дірілді жұмсақ қабылдауға септігін тигізіп, оны тозу мен бүлінуден қорғайды.
Біздің қызметкерлер ақауды дереу анықтап, тозған бөліктерін ауыстырдық, секцияны қайтадан орнына бекіттік. Қазір көпірден өткен кезде ешқандай дыбыс шықпайды, көліктерге қауіпсіз, — деп хабарлады «Таза Өскемен» өкілдері.
Естеріңізге сала кетейік, былтыр желтоқсан айында дәл осы Үлбі көпірінен тағы да ақау шығып, металл құрылымдарды біріктіріп тұрған жігі ажырап кеткен болатын.
