Кеше түнде алматылық «Қайрат» сырт алаңда Словакияның «Слован» командасын жеңіп, Чемпиондар лигасының плей-офф кезеңіне өтті. Соның арқасында клуб бюджеті 4,29 млн еуроға көбейді, деп хабарлайды F16.kz.
Қонақта өткен кездесудің негізгі уақыты 1:0 есебімен алаң иелерінің пайдасына аяқталды. Жалпы есеп – 1:1. Себебі «Қайрат» қарсыласынан дәл осындай есеппен Алматыда басым түскен.
Словакиядағы ойында төреші қосқан овертаймда да матч тағдыры шешілмеді. Қос команда «кім мықтыны» пенальти сериясында анықтады. Пенальтиде қонақтардың жолы болды. Есеп – 3:4. Сөйтіп «Қайрат» клуб тарихында тұңғыш рет Чемпиондар лигасының плей-офф кезеңіне жолдама алды. Еуропаның басты клубтық турнирінде іріктеу кезеңінің финалына шыққаны үшін «Қайрат» 4,29 миллион еуро (2,69 миллиард теңге) табыс тапты. Алда алматылықтарды Шотландияның «Селтигі» күтіп тұр. Егер сәтін салып қазақстандық команда топтық кезеңге өтсе, жүлде қоры 18,62 миллион еуроға (11,7 миллиард теңге) дейін жетеді.
Еске сала кетейік, Чемпиондар лигасының жаңа маусымында «Қайрат» Словенияның «Олимпия» клубын, Финляндияның КуПС командасын және словакиялық «Слованды» жеңді.
