Парламент Мәжілісінің депутаттары, Amanat партиясы фракциясының мүшелері Ерлан Саиров пен Ұлықбек Тұмашинов Алтай қаласының орталық және батыс бөліктерінде жүргізіліп жатқан су құбыры желілерін жаңғырту барысымен танысты, деп хабарлайды F16.kz.
Жалпы құны 2,6 млрд теңге болатын жоба бойынша 110,5 шақырым су құбыры тартылып, 9 420 абонентті орталықтандырылған ауызсу жүйесіне қосу көзделген. Қазір құрылыс-монтаждау жұмысының 95 пайызы аяқталды.
Құрылыс жұмыстары бекітілген кестеге сәйкес жүргізіліп жатыр. Желілер толық тартылып, құбырларды шаю және дезинфекциялау кезең-кезеңімен атқарылып жатыр. Құрылысты толық аяқтамай нысанды пайдалануға бере алмаймыз. Өйткені, ескі су құбырлары 1960 жылы салынған, оны ауыстырмай жаңа желіні іске қосу мүмкін емес. Бұл жұмыстарға шамамен 2,0 млрд теңге қажет, – деді Алтай ауданы әкімінің орынбасары Заңғар Шаухин.
Мәжіліс депутаттары атқарылған жұмыстардың сапасына, қолданылған материалдардың стандартқа сәйкестігіне және жобаның белгіленген мерзімде аяқталуына ерекше назар аударды. Сондай-ақ мердігер ұйым өкілдерімен кездесіп, туындаған мәселелер мен оларды шешу жолдарын талқылады.
Бұл – тұрғындардың күнделікті өмір сапасын жақсартуға бағытталған маңызды жоба. Мыңдаған отбасы таза ауызсумен қамтылады. Сондықтан бүгін көтерілген мәселе бойынша да жұмыс істейміз. Ең бастысы – бөлінген қаражаттың тиімді әрі мақсатты игерілуі және жұмыстардың сапалы орындалуы. Осы бағытта партиялық бақылау күшейтіледі, – деді Мәжіліс депутаты Ерлан Саиров.
Amanat партиясының сайлауалды бағдарламасының Жол картасы аясында былтыр Шығыс Қазақстанда су құбыры желесін тарту және қайта қалпына келтіру бойынша 10 жоба жоспарланған. Бүгінде оның сегізінде құрылыс-монтаждау жұмысы толық аяқталды. Атап айтқанда, Өскеменде екі нысан, Ұлан ауданында үш нысан (Отрадное, Асубұлақ және Бозанбай ауылдарында), Шемонаиха ауданында екі нысан (Березовка және Большая Речка ауылдарында) аяқталды. Нәтижесінде мыңдаған тұрғын сапалы әрі тұрақты ауызсумен қамтылып, өңірдегі елді мекендердің инженерлік инфрақұрылымы айтарлықтай жақсарады.
Қазір қалған екі нысанда құрылыс-монтаждау жұмыстары жүріп жатыр. Мәжіліс депутаттары бұл жобалардың да уақтылы әрі сапалы аяқталуын тұрақты бақылауда ұстайтынын атап өтті.
