2025 жылғы 1 тамыздағы жағдай бойынша Қазақстанда жастар практикасы бойынша 9,1 мың адам жұмысқа орналасты. Биыл бұл салада барлығы 38,9 мың жас қазақстандықты жұмыспен қамту жоспарлануда, деп хабарлайды F16.kz.
Еңбек және халықты әлеуметтік қорғау министрлігінің ақпаратына сенсек, Жастар практикасы бойынша жұмысқа орналасқандардың ең көп саны Түркістан (2,1 мың адам), Жамбыл (802 адам), Қызылорда облыстарында (775 адам) және Шымкент қаласында (665 адам) тіркелген.
Жастар практикасына қатысатын әйелдердің үлесі 62,7% немесе 5,4 мың адамға, ал ауыл тұрғындарының үлесі 58,1% немесе 5 мың адамға тең.
– Алған кәсібі (мамандығы) бойынша бастапқы жұмыс тәжірибесін алу мақсатында білім беру ұйымдарының 35 жастан аспаған жұмыссыз түлектері жастар практикасына қатыса алады. Жастар практикасына қатысу үшін мансап орталығына өтініш беру қажет, – деп жазады министрліктің баспасөз қызметі.
Жұмыс беруші жастар практикасына қатысушыларға кәсіби білім мен жұмыс тәжірибесін беру үшін тәлімгерді бекітеді.
Белгілі болғандай, республика бойынша орташа жалақы мөлшері 109,5 мың теңгеге жеткен. Жастар практикасын қаржыландыруды Еңбек мобильділігі орталығы «Азаматтарға арналған үкімет» мемлекеттік корпорациясы арқылы жүзеге асырады.
Жастар практикасы арқылы жұмысқа орналасқандар арасында ең көп сұранысқа ие мамандықтар: мейіргер – 654 адам, заңгер – 367 адам, бастауыш сынып мұғалімі – 309 адам, тәрбиеші – 292 адам, шет тілі мұғалімі – 282 адам.
