Ұстаздар күніне орай Шығыс Қазақстан облысында «Жаңа дәуір ұстазы: интеллект, еңбек және адалдық» атты салтанатты жиын өтті. Шараға өңірдің түкпір-түкпірінен келген 600-ге жуық білім саласының қызметкері қатысты, деп хабарайды F16.kz.
Өңірде білім саласын цифрландыруға және жасанды интеллект мүмкіндіктерін тиімді пайдалануға баса мән беріліп отыр. Оның аясында биыл облыс мектептерінде 40 жаңа пәндік кабинет жабдықталмақ.
Ұстаз – жай ғана білім беруші емес, ол ел болашағының сәулетшісі. Осы орайда «Ұстаз — ұлттың шамшырағы» деген Президентіміз Қасым-Жомарт Тоқаевтың мұғалімдерге деген зор сенімін айрықша атап өткім келеді. Сіздерге шын жүректен алғыс айта отырып, дендеріңізге саулық, еңбектеріңізге жеміс тілеймін. Облысымызда білім беру саласына баса көңіл бөлініп отыр, пәндік кабинеттерден бөлек, STEM-білім беру, робот техника және техникалық дағдыларды дамыту жағы да жолға қойылған. Заманауи кабинеттер ашылып, онда оқушылар бағдарламалау негіздерін меңгеріп, инженерлік ойлау қабілетін шыңдап, олимпиадалар мен түрлі байқауларға дайындалады, – деді Нұрымбет Сақтағанов
Салтанатты жиын барысында білім саласында еселі еңбек етіп жүрген жандар марапатталды. Атап айтқанда, еңбек ардагерлеріне, үздік педагогтер мен білім бөлімдерінің басшыларына Оқу-ағарту министрлігінің ведомстволық награда-медальдары, Шығыс Қазақстан облысы әкімінің Құрмет грамоталары мен алғыс хаттары табысталды.
Марапат биігінен көрінгендер қатарында Берікбай Жұмабаев та бар. Глубокое ауданына қарасты Тарханка орта мектеп-балабақша кешенінде 18 жылдан бері еңбек етіп келе жатқан ұстаз бүгін «Еңбек ардагері» медалімен марапатталды.
Бүгін еңбегімізді бағалап, ұстаздарға құрмет көрсетіп жатқандарына қуаныштымын. Облыс әкімінің қолынан алған бұл марапат менің емес, ұжымның еңбегі. Соңғы жылдары мемлекет тарапынан ұстаздарға жақсы қолдау көрсетіліп жатыр, жас мамандарға да мүмкіндік көп. Мемлекет басшысы қазір жасанды интеллектке баса назар қойып отыр. Бұл — нағыз жас мамандардың еңбектенетін, заман ағымынан қалмай білімін жетілдіретін кезең. Сондықтан әріптестеріме де, шәкірттерімізге де сәттілік тілеймін, — деді ол.
Шара соңында «Үздік білім бөлімі – 2025» номинациясында жеңімпаз атанған Үлкен Нарын аудандық білім бөлімі мен «Үздік колледж» атағын жеңіп алған Өскемен жоғары политехникалық колледжі марапатталды.
