Ақжар ауылында орналасқан туберкулезге қарсы диспансер жабылуы мүмкін. Бейресми мәліметтерге сүйенсек, медицина мекемесі биылғы 23 қазаннан бастап жұмысын тоқтатады, деп хабарлайды F16.kz.
Туберкулезге қарсы диспансерде бүгінде 60-ға жуық адам жұмыс істейді. Арасында 40 жылға жуық еңбек етіп, зейнет жасына таяп қалған қызметкерлер де бар.
Редакциямызға хабарласқан тұрғындар бір сәтте жұмыссыз қалып, жылдар бойғы еңбегі зая кете ме деп алаңдайды. Себебі, аурухана басшылығы жақында оларға мекеменің жабылатыны туралы ресми ескерту хат берген.
Қолымызға ескерту хат алып, төбемізден жай түскендей болдық. 2,5 айдан кейін 55 жасымда зейнетке шығуым керек еді. 30 жылдан астам уақыт осы мекемеде еңбек еттік, енді сол еңбектің зейнетін көрер шақта аурухананы жауып тастағалы отыр. Ол біздің зейнетақымызға да әсер етеді ғой. Аурухана басшылығына хабарлассам бос жұмыс орны жоқ екенін айтты. 60 адам бір сәтте жұмыссыз қалып отырмыз. Қыс болса келіп қалды, отын-көмір, несиеміз тағы бар, арамызда көпбалалы аналар да бар. Сонда біздің жағдайымызды кім ойлайды? — деді Айгүл Иманбекова.
Мекеме басшылығы қызметкерлерге бір айлық жалақы мөлшерінде өтемақы төленетінін айтқан. Алайда жұмыссыз қалған қызметкерлердің басқа жұмысқа орналасатынына кепілдік жоқ.
Әлеуметтік желіде тараған бұл ақпарат аурухана қызметкерлерінің ғана емес, Тарбағатай тұрғындарының алаңдаушылығын туыдырды.
Шекаралық ауданды адамға толтыра алмай жатқанда, мекемені жауып, 60 адамды жұмыссыз қалдырған дұрыс емес. Қылышын сүйретіп қыс келе жатыр. Осыдан кейін халықтың, жастардың қалаға жаппай көшіп кетпесіне кім кепіл? – деп жазды әлеуеметтік желі қолданушылары.
Ауыл тұрғындары Парламент Мәжілісінің депутаты Ерлан Сайыровтан да көмек сұрады. Біздің редакция бұл мәселеге қатысты облыстық денсаулық сақтау басқармасына хабарласты, тиісті мекеме әзірге ресми жауап берген жоқ. Оқиғаның қалай өрбитінін назарда ұстаймыз.
