Бүгінде Қазақстанда ағзаларды транспланттаудың күту парағында 4 384 пациент бар және олардың 121-і бала. Бұл туралы ҚР Денсаулық сақтау министрлігінің Трансплантация және жоғары технологиялық қызметтерді үйлестіру жөніндегі республикалық орталығы директорының міндетін атқарушы Назгүл Жангелдина мәлім етті, деп хабарлайды F16.kz.
Белгілі болғандай, пациенттердің басым бөлігі – бүйрек трансплантациясын қажет ететіндер, олардың күту парағындағы үлесі 91%-ға жетеді. Сондай-ақ бауырды 222 пациент, жүректі – 149, өкпені – 27, өкпе-жүрек кешенін 6 адам күтуде. Жыл сайын жаңа ағзаны қажет еткен 300-ден астам адам трансплантацияға жете алмай, өмірден озады.
Мамандардың айтуынша, 2012 жылдан бері Қазақстанда 3 200-ден астам ағза трансплантациясы жасалды, олардың негізгі бөлігі – тірі донорлардан жасалған операциялар. Ал 2023 жылдан бастап консервацияланған мөлдір қабықты трансплантаттау енгізілді, 308 ауыстырып салу операциясы жасалды. Алайда, бүкіл жүйенің дамуы ең алдымен қайтыс болғаннан кейінгі донорлыққа тікелей байланысты болып отыр.
– Бүгінде eGov.kz порталында 135 мыңнан астам ерік білдіру өтініштері тіркелген, бірақ олардың ішінен небәрі 10 724 адам ғана қайтыс болғаннан кейін донор болуға келісім берген, ал 112 мыңнан астам адам бұдан бас тартқан, – деп жазады Денсаулық сақтау министрлігінің баспасөз қызметі.
Келісім білдірушілер саны артқанына қарамастан, бас тарту үлесі одан да жылдам өсіп келеді. Бұл қоғамда әлі де сенімсіздік пен ақпараттану деңгейінің төмен екенін көрсетеді.
Донорлық үдерістердің ең жоғары белсенділігі Астана мен Алматы қалаларында, сондай-ақ Павлодар, Ақмола, Шығыс Қазақстан, Батыс Қазақстан және Жамбыл облыстарында байқалады. Ал Атырау, Маңғыстау, Ақтөбе, Қызылорда және Қарағанды өңірлерінде көрсеткіштер өте төмен деңгейде қалып отыр.
