Көктем шыққалы бері Шығыс Қазақстан облысында кене шаққан 90 адам медициналық мекемелерге жүгінген. Зардап шеккендердің жартысына жуығы – балалар. Бұл былтырғымен салыстырғанда жоғары, деп хабарлайды F16.kz.
ШҚО санитариялық-эпидемиологиялық бақылау департаменті басшысының орынбасары Сәуле Слямғазинаның айтуынша, көктемде кенелердің белсенді болуы жыл сайын қайталанатын табиғи құбылыс. Дегенмен биылғы маусымда медициналық көмекке жүгінушілер санының артуы алаңдатып отыр.
Соған қарамастан өңірде кене арқылы жұғатын аса қауіпті аурулар – кене энцефалиті, лайм ауруы және кене риккетсиозы қатарлы ауруларға шалдыққандар әзірге анықталған жоқ. Дәрігерлер жағдайдың тұрақты бақылауда екенін атап өтті. Алайда эпидемиологтардың болжамынша, аурудың шарықтау кезеңі дәстүрлі түрде мамыр айына сәйкес келеді, сондықтан алдағы уақытта қауіп деңгейі сақталуы мүмкін.
Кене шаққан азаматтардың басым бөлігі дер кезінде медициналық көмекке жүгінген. Нәтижесінде зардап шеккендердің 93 пайыздан астамына профилактикалық мақсатта иммуноглобулин егілген. Мамандар уақтылы емдеу мен алдын алу шаралары асқыну қаупін айтарлықтай төмендететінін еске салады.
Сәуле Слямғазинаның айтуынша, облыста кене белсенділігі жоғары аймақтар жыл сайын өзгеріссіз қалып отыр. Олардың қатарына Алтай, Катонқарағай, Глубокое және Ұлан аудандары, сондай-ақ Өскемен мен Риддер қалаларының маңайындағы аумақтар кіреді. Дәл осы өңірлерде кене шағу жағдайлары жиі тіркеледі.
Мамандар тұрғындарды табиғат аясында сақтық шараларын қатаң сақтауға шақырып, жабық киім кию, арнайы қорғаныш құралдарын қолдану және орманды аймақтардан қайтқаннан кейін міндетті түрде тексеруден өтудің маңызын ескертті.
