Жеңіс жалыны сөнбейді: Өскемен халқы ерлікке тағзым етті

Өскеменде Жеңістің 80 жылдығына арналған мерекелік іс-шаралар өтіп жатыр, деп хабарлайды F16 тілшісі.

$\"\"$ Сондай шаралардың бірі бүгін облыс орталығындағы Жеңіс мемориалының маңында ұйымдастырылды.

$\"\"$ Дәлірек айтсақ, бұл күні жүздеген қала тұрғыны мен қонақтары мемориал жанындағы Жеңіс саябағында батырларды құрметтеу және обелиске гүл шоқтарын қою рәсіміне жиналды. Мерекелік іс-шараға Шығыс Қазақстан облысының әкімі Нұрымбет Сақтағанов та қатысып, құттықтау сөз сөйледі. Ол соғыс ардагерлеріне және тыл еңбеккерлеріне сонау отқа оранған жылдардағы жанкештілігі мен батылдығы үшін алғыс айтып, бүгінде батырларды ерлігін ұмытпау аса маңызды екенін атап өтті.

$\"\"$

Бүгін бұл жерде басқосуымыздың себебі ерекше. Сұрапыл соғыс жылдарында асқан ерліктің үлгісін көрсеткен жерлестеріміздің есімін есте сақтап, ұлықтау – парызымыз. Биыл облысымызда тұрып жатқан соғыс ардагерлерінің әрқайсына 5 миллион теңге мөлшерінде біржолғы төлемдер есептелді. Бұл біздің ардагерлерге деген шексіз алғысымыз бен құрметіміздің бір парасы ғана. Біз сіздерге мәңгілік қарыздармыз. Сіздер кейінгі ұрпаққа батылдықтың, төзімділік пен өз Отанына деген сүйіспеншіліктің ерен үлгісін көрсеттіңіздер. Құрметті жерлестер, біздің басты міндет – бейбіт күннің қадірін түсініп, адал қызмет арқылы мемлекетіміздің өркендеуіне өз үлесімізді қосу. Бүгінгінің нағыз батыры – өз ісіне жауапкершілікпен қарап, тынымсыз еңбегімен қоғамға пайда әкеліп жүрген әрбір еңбек адамы. Баршаңызды тағы бір мәрте жеңіс күнімен құттықтаймын! Аспанымыз ашық, Тәуелсіздігіміз тұғырлы болсын! – деді аймақ басшысы.

Әрі қарай жиналған қауым қан майданда жеңіс үшін жанын пида еткен боздақтарды бір минут үнсіздікпен еске алып, мемориалға гүл шоқтарын қою рәсіміне қатысты.

$\"\"$ Жеңістің 80 жылдығына арналған іс-шара қаланың өнер ұжымдарының концертімен аяқталды.