Биылғы 15 сәуірден бастап екінші деңгейлі банктер азаматтардың мобильді аударымдары туралы мәліметті салық органдарына ұсына бастайды. Бұл туралы ҚР Қаржы министрлігі Мемлекеттік кірістер комитеті басқармасының басшысы Ерқанат Шынберген мәлімдеді, деп хабарлайды F16.kz.
Оның айтуынша, банктер жеке есепшоттарға түскен қаражатқа тұрақты түрде мониторинг жүргізеді. Атап айтқанда, үш ай ішінде 100-ден астам әртүрлі адамнан аударым жасалып, сол кезеңдегі жалпы сома 1 миллион теңгеден асып кеткен жағдайда ғана бұл ақпарат салық органдарына жолданады.
Сонымен қатар есепшот тек жеке мақсатта қолданылған жағдайда, азамат мұны растай алуға тиіс. Мемлекеттік кірістер комитеті бірден әкімшілік шара қолданбайтынын атап өтті. Алдымен аударымдардың сипаты сарапталып, есепшот иесінің кәсіпкерлік қызметпен айналысу-айналыспауы, салық міндеттемелерін толық орындағаны тексеріледі. Камералдық бақылау нәтижесіне сәйкес тиісті шешім қабылданады. Яғни, салық органынан хабарлама келген жағдайда, азамат өз есепшотын кәсіпкерлік емес, жеке мақсатта пайдаланғанын дәлелдеуге заңды құқығы бар.
Егер жүргізілген тексеру барысында мобильді аударымдардың кәсіпкерлік қызметке қатысты екені анықталса, салық төлеуші қосымша есептілік тапсыруға міндеттеледі. Ал жеке кәсіпкер ретінде тіркелмеген азаматтарға заң талаптарына сәйкес ресми тіркеуден өту қажеттігі туындайды.
