Шығыстың бас шаһарында Алтай ауданының ауыл шаруашылығы жәрмеңкесі өтті. Жергілікті тауар өндірушілер, шаруа қожалықтары мен фермерлер облыс орталығына 15 тоннадан астам өнім әкелді, деп хабарлайды F16.kz.
Өскемен тұрғындары мен қонақтарына азық-түліктің түр-түрі арзан бағамен ұсынылды. Атап айтқанда, сиыр, жылқы, қой еті, құс еті, сүт өнімдері, көкөніс, бал, өсімдік майы, балық және басқа табиғи өнімдер сатылды. Базаршылап келген жұртет пен сүттен бөлек, тұздалған көкөніс, тосап және үйде жасалған қыстық азық-түлікті молынан алды.
Бүгін тұздалған өнімдер, құс еті, ет, сүт, картоп әкелдік, барлығы төмен бағамен сатылып жатыр. Жәрмеңке басталысымен-ақ өнімнің жартысын пышақ үстінен талап әкетті. Шамамен 150 келі картоп әкелген едік, бірден таусылып қалды. Тұздалған өнімдерді де алып кетеді, тосаптан ештеңе қалмады, барлығы тура бір сағаттың ішінде сатылды. Өйткені біздің өнімдер экологиялық таза, дәмді әрі арзан, – деп атап өтті Полянское ауылдық округінің әкімі Ержан Өмірбаев.
Өскемен тұрғындары жәрмеңкеде сауда-саттықтан бөлек Алтай ауданы өнерпаздарының концертін тамашалады. Сахнада шығармашылық ұжымдар ән шырқап, би билеп, көпшілікке мерекелік көңіл-күй сыйлады.
Еске сала кетейік, жәрмеңке жергілікті тауар өндірушілер мен фермерлерді қолдауға, сондай-ақ мәдени мұраны сақтауға бағытталған «Туған жер – алтын бесігім» акциясы аясында өткізіліп келеді.
