Кеше, 19 маусымда Павлодар облысында соққан қатты дауылдан бір адам мерт болып, 16 адам зардап шекті. Желдің екпіні 43 метр секундқа дейін жетті, деп хабарлайды F16.kz порталы pavlodarnews.kz—ке сілтеме жасап.
Сұрапыл дауылдан электр желілері қирап, елді мекендерде жарық өшті.
Төтенше жағдайлар қызметі таратқан ақпаратқа сүйенсек, табиғат апатынан электр желілеріне зақым келіп, елді мекендерде жарық өшкен. Павлодар қаласында елуге жуық мекеменің шатыры қираған. Сондай-ақ Ақсу, Екібастұз қалаларында, Баянауылда және басқа да бірнеше ауданда ғимараттар бүлінген. Қатты желден 16 адам зардап шегіп, Ақсу қаласында 1968 жылы туған әйел адам қаза тапты.
Кешелі бері аймақта табиғат апатының салдарын жою жұмыстары жүргізіліп жатыр. Оған 300-ден астам адам, 100-ден астам техника жұмылдырылған.
