2024 жылы Қазақстанға Қытайдан 655 мың турист келген, деп хабарлайды F16.kz тілшісі еліміздің Туризм және спорт министрлігіне сілтеме жасап.
Бұл 2023 жылғы көрсеткіштен 78% жоғары екен. Осыдан екі жыл бұрын елімізге көрші мемлекеттен 367 мың адам келіп қайтқан.
– «Қытайдағы Қазақстан туризмі жылы» аясында Қытайдың ірі қалаларында 37 іс-шара ұйымдастырылды. Соның нәтижесінде туристер ағыны бірнеше есе артты, – деп хабарлайды министрліктің баспасөз қызметі.
Айта кетейік, бұл күндері Астанадағы Ұлттық музейде Қазақстандағы Қытай Халық Республикасының туризм жылы және «Жібек пен Жібек жолы: Қытайдан Қазақстанға» атты көрме өтуде.
Іс-шараның ашылуына қатысқан ҚР Туризм және спорт министрі Ербол Мырзабосынов Қазақстандағы Қытай Халық Республикасының туризм жылы аясында екі ел арасындағы туристік бастамаларды қолдауға бағытталған бірқатар жобаны ұсынды.
Атап айтқанда, Қазақстанда Қытай туристеріне қолайлы жағдай жасауға мүмкіндік беретін Welcome Chinese бағдарламасын енгізу. Бағдарлама қонақ үйлердің, туристік компаниялар мен нысандардың Қытайдан келетін қонақтардың қажеттілігіне бейімделуге көмектеседі. Бұдан бөлек, туризм, спорт және мәдениетті тоғыстыратын бірегей шекаралық марафон ұйымдастыру және туристік жоғары оқу орындары арасындағы академиялық ұтқырлықты арттыру арқылы білім мен тәжірибе алмасу ұсынылды.
