Глубокое ауданының Черемшанка ауылында жергілікті тұрғындар көптен күткен көпір жөнделді, деп хабарлайды F16.kz.
Черемшаночка өзенінің үстінен өтетін көпірдің құрылысы ауыл халқының өтініші негізінде аудандық мәслихат депутаты Кеңес Омаровтың бастамасымен жүзеге асқанын айта кету керек.
Бұл жұмысты атқаруға қажетті техника мен құрылыс материалдары бөлініп, жалпы құны 20 млн теңгеден астам қаражат жұмсалды. Қазір құрылыс толық аяқталып, көпір пайдалануға берілді.
Біздің басты міндет – халықтың нақты сұранысына дер кезінде жауап беру. Черемшанка ауылындағы көпірдің жағдайы біраз жылдан бері тұрғындарды алаңдатып келген еді. Сол себепті оны қалпына келтіруді өзімнің тікелей бақылауыма алдым. Бүгінде нысан жаңарып, адамдарға қауіпсіз әрі қолайлы жағдай жасалды. Бұл – біздің тұрғындармен бірге атқарған ортақ еңбектің нәтижесі, — деді депутат Кеңес Омаров.
Ауыл тұрғындары да игі іске ризашылықтарын білдірді.
Көп жылдан бері көпір арқылы жүру қауіпті болатын. Балаларымыз мектепке барғанда, қыста мұз, көктемде су тасығанда өту қиын еді. Қазір көпір толық жөнделіп, қауіпсіз болды. Депутатымызға және атсалысқан азаматтарға алғыс айтамыз, — деді ауыл тұрғыны Валентина Денисова.
Бұл игі іс — халық пен депутаттық корпустың тығыз байланысының айқын дәлелі.
