Өскеменде Қала күніне және Конституцияның 30 жылдығына орай бірқатар ауқымды іс—шара өткізіледі. Облыс орталығы тұрғындары үшін дәстүрге айналған Бал фестивалі мен ауыл шаруашылығы жәрмеңкесі биыл да жалғасын табады, деп хабарлайды F16.kz.
Алтай балының даңқын аспандатқан фестиваль 30 тамыз күні әдеттегідей орталық алаңда болады. Оған Риддер қаласының, Катонқарағай, Күршім, Зайсан, Алтай, Глубокое, Шемонаиха, Ұлан қатарлы аудандардың балдан бұлақ ағызған омарташылары қатысады. Шығыстың брендіне айналған тау балы, әртүрлі шөптен, сол сияқты қарақұмық, күнбағыс өсімдіктерінен жиналған алуан түрлі бал осы күні көпшілікке арзан бағада ұсынылады.
Ауыл шаруашылығы басқармасының дерегіне сүйенсек, Шығыс Қазақстан облысы елімізде бал өндіру көлемі жағынан бірінші орынды иеленіп отыр, бұл республикалық өндірістің 47 пайызына тең. Былтыр өңірде 2898,5 тонна бал өндірілген, бұл 2023 жылмен салыстырғанда 1,5 есе көп.
Сонымен қатар былтыр экспорт көлемінің 19,3 тоннаға дейін өсуі омарта шаруашылығының оң бағытта дамып келе жатқанын көрсетеді.
