Шығыс Қазақстан облысында балық шаруашылығын дамыту бағытындағы жұмыстар кезең-кезеңімен жалғасып келеді. Өңірде акваөсіруді кеңейту, өндіріс көлемін арттыру және судағы биоресурсты сақтау мақсатында бірқатар жоба іске асырылып жатыр, деп хабарлайды F16.kz.
ШҚО табиғи ресурстар және табиғат пайдалануды реттеу басқармасының мәліметінше, келер жылы облыста 3 746 тонна тауарлық балық өсіру көзделіп отыр. Бұл өңірдегі балық шаруашылығы кәсіпорындарының өндірістік әлеуетін арттырып, ішкі нарықты сапалы өніммен қамтамасыз етуге мүмкіндік береді.
Осы бағытта Бұқтырма су қоймасында торлы балық өсіру шаруашылықтарын дамыту жоспарланып отыр. Атап айтқанда, жалпы жобалық қуаты 3 200 тоннадан асатын торлы шаруашылықтарды орналастыру үшін бес резервтік учаске бекітіледі. Саланы қолдау мақсатында 189 миллион теңге көлемінде мемлекеттік субсидия бөлініп, шамамен 499 миллион теңге көлемінде жеке инвестиция тарту жоспарланып отыр. Бұл өндірістік қуатты кеңейтіп, жаңа жұмыс орындарын ашуға мүмкіндік береді.
Тағы бір маңызды бағыт – сирек кездесетін балық түрлерінің популяциясын қалпына келтіру. Осы мақсатта Қара Ертіс өзеніне 260 мың дана сібір бекіресінің шабақтары жіберіледі. Бұл шараға 260 миллион теңге қарастырылған. Мамандардың афтуынша, мұндай жұмыстар өңірдегі бағалы су биологиялық ресурстарын сақтап, қалпына келтіруге ықпал етеді.
