Көлігін құлаған ағаш басып қалған өскемендік тұрғын қаланың коммуналдық қызметінен сот арқылы 2,5 млн теңге өтемақы өндіріп алды, деп хабарлайды F16.kz.
Естеріңізде болса, биылғы сәуір айында Өскеменде қатты дауыл соғып, Виноградов көшесінің бойында қаңтарылып тұрған көліктердің үстіне үлкен ағаш құлаған. Жол жиегіндегі мәшіндердің ішінде көп зардап шеккен Honda Civic маркалы темір тұлпардың иесі өтемақы талап етіп, сотқа шағымданған. Өйткені құлаған ағаш жол бойында, яғни қала аумағында өсіп тұрғандықтан оны күтіп ұстау «Таза Өскемен» коммуналдық кәсіпорнының міндеті деп есептеді зардап шегуші.
Сот барысында шағымданушы ағаштың дұрыс күтім жасалмауынан құлағанына дәлелдер келтірді. Тұрғын үй коммуналдық-шаруашылығымен жасалған келісімшарттың техникалық сипаттамасында жазылғандай ағаштың артық өскен бұтақтарын кесу, құлағалы тұрғандарын алып тастау, жалпы қаланың инфрақұрылымын тексеріп, қауіпті нысандарды жою жұмыстары коммуналдық қызметтің міндетіне кіреді. Ал тиісті мекеме бұл жұмыстың бірін де атқармаған, соның салдарынан өсіп тұрған үлкен ағаш дауылға шыдамай құлаған.
Нәтижесінде сот зардап шеккен тұрғынның келтірген дәйектерін негізді деп санап, оған “Таза Өскемен” кәсіпорнынан 2 418 250 теңге өтемақы өндіріп алу жөнінде шешім шығарды.
