29 қарашада өтетін мәслихат депутаттарының сайлауына республика бойынша 10 971 кандидат тіркелген. Орталық сайлау комиссиясының төрағасы Нұрлан Әбдіров бір депутаттық мандатқа қанша адам үміткер болатынын айтты, деп хабарлайды F16.kz.
Нұрлан Әбдіровтің айтуынша, мәслихаттағы бір депутаттық мандатқа орта есеппен үш кандидат таласады. 20 өңірде саяси партиялар 99 партиялық тізім ұсынған, оған 1 219 адам кіріп отыр. Партиялық тізімдердегі әйелдер мен жастардың жиынтық үлесі 43,2 пайыз болды.
Тағы 9 752 кандидат 3 113 бір мандатты округ бойынша тіркеліпті.
ОСК басшысы кеше сайлау алдындағы үгіт басталғанын еске салды. Енді кандидаттар мен саяси партиялар сайлаушыларға өз бағдарламаларын ұсына алады.
«Сайлау алдындағы үгіт кезеңінде сайлау заңнамасы талаптарын сақтау, барлық кандидат пен саяси партияларға тең жағдай, сондай-ақ сайлау науқанының ашықтығы мен жариялылығын қамтамасыз ету маңызды», — деді Н.Әбдіров.




