Өскемендегі Ана мен бала орталығында жасөспірімдерге арналған кабинет ашылды. Онда жеткіншектер медицина мамандарынан денсаулыққа қатысты кеңес алып, профилактикалық тексеруден өтеді, деп хабарлайды F16.kz.
Жасөспірім кезең – жас тұлға қалыптасатын, белсенді физикалық және эмоционалдық даму болатын, денсаулық, тамақтану, спорт және өмір салты туралы алғашқы сұрақтар туындайтын өмірдің ерекше кезеңі. Балалар өздерін сенімді сезініп, кеңеске немесе көмекке қайда жүгінетінін білулері үшін біз арнайы кеңістік құрдық, – деп жазды Ана мен бала орталығының мамандары.
Жасөспірімдер кабинетінде, профилактикалық тексеруден өтуге, денсаулық, тамақтану және спорт жөнінде, салауатты әдеттерді қалыптастыру туралы кеңес алуға, дәрігермен маңызды нәрселер туралы сөйлесуге, қажет болған жағдайда уақтылы медициналық көмек алуға болады.
Ана мен бала орталығы Өтепов көшесі 37 мекен жайында орналасқан. Қабылдау кабинеті – 213.
