Парламент Мәжілісінің депутаты Асылбек Нұралин Өскемендегі Жасөспірімдер үйінде тәрбиеленушілермен кездесу өткізді. Кездесу депутаттың Шығыс Қазақстан облысына жұмыс сапары аясында ұйымдастырылды, деп хабарлайды F16.kz.
Жиын барысында мекеме қызметкерлері кейбір мамандық иелерінің еңбекақысы мардымсыз екенін айтты. Мәселен, еден жуушы, тазалықшы, күзетші сынды қарапайым еңбек адамдарының алатын жалақысы бір отбасын асырауға жеткіліксіз. Болашақта осындай мамандық иелерінің еңбекақысы көтерілсе деген өтініш айтылды.
Бұл мәселе қазір ірі мекемелер мен компаниялардың өзінде өзекті болып тұр. Ең алдымен, қауіпсіздік пен жұмысқа қолайлы жағдай жасауға назар аударылуы қажет. Ал жалақы мәселесі соңғы 15 жылда жиі көтеріліп келе жатыр. Әлеуметтік-мәдени комитет мүшесі болғандықтан бұл маған тікелей қатысты, – деген Асылбек Нұралин алдағы уақытта бұл сұрақты міндетті түрде Мәжіліс мінберінде көтеретінін жеткізді.
Шығыс Қазақстан облысына сапары аясында депутат Өскемендегі бірқатар әлеуметтік мекемеге барып, өндіріс орындарын аралады, партия активімен және жергілікті тұрғындармен кездесулер өткізді.
Дана Әбдікәрім
