Қазақстан президенті Қасым-Жомарт Тоқаев PepsiCo компаниясы директорлар кеңесінің төрағасы Стивен Кихоны қабылдады. Кездесуде америкалық алпауыт компанияның еліміздегі инвестициялық жобасын жүзеге асыру барысы қарастырылды, деп хабарлайды F16.kz порталы Ақордаға сілтеме жасап.
Президент мырза, қабылдағаныңыз үшін алғыс айтамын. Бүгінгі Нью-Йорктегі жұмыс күніңізді бізбен кездесуден бастағаныңызға ерекше қуаныштымыз. PepsiCo компаниясының Қазақстанға салған инвестициясы – біздің ең маңызды әрі мақтан тұтатын жобаларымыздың бірі. Бұл біздің экожүйеміздегі снэк шығаратын ең үлкен зауыт санатында болады. Біз өндірістің тезірек ашылып, толық іске қосылуын асыға күтеміз. Зауыт келер жылы маусым айында ашылады деп үміттенеміз. – деді Стивен Кихо.
Мемлекет басшысы Қасым-Жомарт Тоқаев жобаны іске асырудан күтілетін экономикалық пайдаға назар аударды.
Еске сала кетсек, PepsiCo Қазақстанда жалпы құны 368 миллион АҚШ долларына тең жаңа снэк өнімдерін өндіретін зауыт құрылысын бастап кетті. Жоба жүзеге асқан жағдайда, шамамен 900 жаңа жұмыс орны ашылады.
Компания Қазақстанда чипсілерге арналған картопты жергілікті жерде өсіруді жолға қояды. Қазірдің өзінде бұл іске Павлодар, Ақмола, Қарағанды, Жетісу және Алматы облыстарынан 15 шаруашылық тартылған. Сонымен қатар, PepsiCo ауыл шаруашылығында заманауи ғылыми тәсілдерді енгізіп, өнімділікті арттыру үшін қоймалау инфрақұрылымын дамытып жатыр.
