Батыс Қазақстан облысында полицейлер 1,3 млн теңгенің алаяқтарға аударылуына жол бермеді, деп хабарлайды F16.kz порталы Polisia.kz-ке сілтеме жасап.
Алдын алу шараларын өткізу барысында полиция қызметкерлері қаладағы сауда ойын-сауық орталықтарының бірінде терминал жанында тұрып, бір уақытта телефонмен сөйлесіп тұрған ер адамды байқайды. Ер адамның деректерді енгізу кезінде уайымдап, асығыс әрекет етуі күмән тудырған. Полицейлер араласып, телефонның ар жағында алаяқтар болуы мүмкін екенін түсіндіруге тырысқан. Алайда ер адам ақшаны аударуға табандап тұрып алған. Телефон тұтқасындағы өзін «Тамара» деп таныстырған әйел оған ешкімді тыңдамауға кеңес беріп, бірнеше минуттан кейін «қызы» мен «ұлы» да әңгімеге қосылған. Кейін белгілі болғандай, бірнеше күн бойы алаяқтар ер адамға телефон шалып, өздерін полиция қызметкерлері ретінде таныстырып, оның жинақтары қауіпте екенін айтып сендірген. Ақшаны «сақтап қалу» үшін оған депозиттен қаражатты шешіп, «қауіпсіз» есепшотқа аудару керек болған. Полиция қызметкерлерінің дер кезінде әрекет етуінің арқасында 1,3 миллион теңгенің аударылуына жол берілмеді. Телефон және интернет арқылы жасалатын алаяқтықтың, әсіресе зейнеткерлерге бағытталған қылмыстардың көбеюіне байланысты Батыс Қазақстан облысында полиция және жеке күзет қызметкерлері банкоматтар маңында және халық көп жиналатын орындарда, оның ішінде сауда ойын-сауық орталықтарында алдын алу шараларын жүргізуде. Мақсат — «тәуекел аймағында» жедел әрекет ету, алаяқтарға ақша аударудың алдын алу және халықтың ақпараттандырылуын арттыру. Полиция құқық қорғау органдарының нағыз қызметкерлері ешқашан ақша аударуды талап етпейтінін еске салады. Күмән тудыратын кез келген қоңырау кезінде бірден «102» нөміріне хабарласу қажет.
