Шығыс Қазақстан облысының Сарыбел ауылында «Kcell» акционерлік қоғамының қолдауымен барлық негізгі ұялы байланыс операторларының тұрақты желісі іске қосылды. Енді ауылда Beeline, Kcell және Tele2 операторларының сигналы тұрақты жұмыс істейді, деп хабарлайды F16.kz.
Бұған дейін ауыл тұрғындары мен туристер байланыс сапасының төмендігіне жиі шағым айтатын. Сапасыз интернет онлайн қызметтерді, төлем жүйелерін, жарнаманы және туристік сервистерді толық пайдалануға мүмкіндік бермеді.
Айта кету керек, Самар ауданының Сарыбел ауылы – өңірдегі туристік әлеуеті зор аймақтың бірі. Мұнда арнайы ат терлетіп келетін туристер саны да жыл санап көбейіп келеді. Мәселен, округ бойынша жағажайда демелушылар саны 50 мыңға жеткен. Алдағы уақытта бұл көрсеткіш жақсарта түседі. Өйткені сапалы байланыс пен қолжетімді мобильді интернет туризм саласының дамуына ерекше ықпал ететіні белгілі.
Ауыл тұрғындары да көптен бері көтеріп келе жатқан өзекті мәселе шешімін тапқанына қуанышты. Бастама ауылдың дамуына, әсіресе туризм мен шағын бизнестің өркендеуіне серпін беретініне сенімді.
