Шығысқазақстандық спортшы, пауэрлифтингтен Азия чемпионы Сергей Веселовті Сауд Арабиясының құқық қорғау қызметкерлері қамауға алды, деп хабарлайды F16.kz.
Бұл ақпаратты отандық спорт басылымдары таратты және оны Қазақстанның Сыртқы істер министрлігі, сондай-ақ спортшының туыстары растады.
Сергейдің әкесінің айтуынша, ұлы 19 маусымда Астанадан Ыстамбұлға ұшып, одан әрі Сауд Арабиясына жол тартқан. Сапардың алғашқы аптасында ол отбасымен тұрақты байланыста болған. Кейін байланыс үзіліп, туыстары оны іздей бастаған.
Қазір оның тірі екенін анықтадық. Тергеу изоляторында отырғаны белгілі, бірақ нақты қай бөлімде екені және қандай бап бойынша айып тағылғаны айтылмайды. Қазір ұлыммен ешқандай байланыс жоқ. Консул оған еріктілер тобын жіберді. Оларда бар-жоғы бір минут уақыт болды. Олар ұлымнан жағдайы, денсаулығы қалай екенін сұрады. Сергей құпия сөзді айтты. Біздің отбасында құпия сөз бар, оны ол бала кезден біледі. Керек кезде айту үшін ойластырғанбыз. Міне сол сөзді айтты, ол шынымен де менің ұлым, – деді спортшының әкесі.
Қазақстанның Сыртқы істер министрлігі спортшының ұсталғанын растады.
Құқық қорғау органдары ұстады. Қазір ол Медина қаласында. Әзірге ешқандай айып тағылған жоқ. Жағдайдың мән-жайын анықтап жатырмыз, – делінген министрліктің берген жауабында.
Қазір бұл жағдайға қатысты қандай да бір нақты мәлімет жоқ, ұсталудың ресми себебі де белгісіз.
Сергей Веселов Шығыс Қазақстан облысының бірнеше дүркін жеңімпазы, пауэрлифтингтен әлем чемпионатының жүлдегері және Азия чемпионы екенін айта кетейік.
