Шығыс Қазақстан облысында сауда орындарынан алтын әшекейлерді ұрлаған ер адам қолға түсті, деп хабарлайды F16.kz.
Дүкендерге келтірілген жалпы шығын бір миллион теңгеден асты.
Алғашқы жағдай Өскемендегі ломбардтардың бірінде болған. Ер адам бұйым сатып алуға келген сатып алушы ретінде әрекет етіп, сатушының назарын басқа жаққа аударған сәтті пайдаланған. Осы кезде ол құны 501 295 теңге болатын алтын алқаны қалтасына салып, алып кеткен, — дейді ШҚО ПД баспасөз қызметі.
Бірнеше күннен кейін қаладағы басқа сауда орнында ұқсас жағдай қайталанған. Бұл жолы күдікті дәл осы тәсілмен құны 500 000 теңге болатын алтын білезікті ұрлаған.
Арыздар түскеннен кейін полиция қызметкерлері күдіктінің жеке басын жедел анықтады. Ол аудандардың бірінде тұратын 30 жастағы ер адам болып шықты.
Аталған деректер бойынша қылмыстық іс қозғалды. Күдікті уақытша ұстау изоляторына қамалды, — делінген департаменттің баспасөз қызметі таратқан хабарламада.
Шығыс Қазақстан облысының Полиция департаменті бөтеннің мүлкін ұрлағаны үшін қылмыстық жауапкершілік қарастырылғанын тағы бір еске салады.
