Шемонаиха ауданының Большая Речка ауылында су құбырларын тартып жатыр. Ауқымды инфрақұрылымдық жобаның жалпы құны – 552,4 млн теңге, деп хабарлайды F16.kz.
Нәтижесінде ұзындығы 17,1 шақырым болатын құбыр желілерін тарту, жаңа (резервтік) су ұңғымасын бұрғылау, су тарту және су тарату нысандарын салу көзделген. Оның ішінде үш насос станциясының, көлемі 75 текше метрлік екі таза су резервуарының құрылысы бар.
Жобаны 2024 жылдан «Sem ARTA Stroy» ЖШС мердігер ұйымы жүзеге асырып жатыр. Былтыр облыстық бюджеттен 71 млн теңге бөлініп, толық игерілді. Ал биыл жобаға республикалық бюджеттен 200 млн теңге, арнаулы мемлекеттік қордан 242,2 млн теңге бөлінді.
Бүгінде жоспарланған 17,1 шақырымның 12 шақырымы төселіп, 86 құдықтың 46-сы орнатылды. Су ұңғымасын бұрғылау аяқталуға жақын, насос станцияларында жер қазу және іргетасын құю жұмыстары басталды. Құрылыс алаңында 26 маман және алты арнайы техника жұмыс істеп жатыр. Құрылыс-монтаж жұмыстарының 40%-ы орындалды. Нысанды пайдалануға беру биылғы қазанға жоспарланған. Жобаны іске асырудың арқасында шекаралық аймақтағы Большая Речка ауылының 355 тұрғыны сапалы ауызсумен қамтамасыз етіледі.
