Бүгін Шығыстың бас шаһарында тоғыз елдің дипломатиялық өкілдері бас қосқан ауқымды форум өтті. Шара барысында шет мемлекеттен келген қонақтарға өңірдің инвестициялық әлеуеті, өндірістік, ғылыми және туристік мүмкіндіктері таныстырылды, деп хабарлайды F16.kz.
Өзбекстан, Қырғызстан, Оңтүстік Корея, Беларусь, Өзбекстан, Ресей, Швеция, Қытай және Бельгиядан келген дипломатиялық өкілдер алдымен Д.Серікбаев атындағы ШҚТУ-дың оқу зертханасын, артынша өңірдің инвестициялық әлеуетін көрсететін көрмені аралады.
Біз ел Президенті Қасым-Жомарт Тоқаевтың тапсырмасымен, өңірдің инвестициялық әлеуетін арттыру үшін осындай халықаралық, экономикалық байланыстарды дамыту мақсатында жүйелі жұмыс жүргізіп жатырмыз. Шығыс Қазақстан – қуатты, өнеркәсіптік, ғылыми және табиғи әлеуеті зор өңірдің бірі. Кейінгі жылдары бұл бағыттар қарқынды дамып келеді. Биыл қыркүйек айында халықаралық инвестициялық форум өткізуді жоспарлап отырмыз. Дипломатилық миссия өкілдері сол кезде өздерінің нақты ұсыныстарымен келіп, түрлі жобаларға келісімшарт жасалады деген үміттеміз, – деді ШҚО әкімі Нұрымбет Сақтағанов.
Аймақ басшысы мұндай шаралар экономикалық және мәдени байланыстарды нығайтуда үлкен рөл атқаратынын атап өтті.
Форум Шығыс Қазақстан облысының ашықтығын және шетелдік инвесторлармен әріптестікті тереңдетуге дайын екенін көрсетті.
