Биыл жазда Бұқтырма су қоймасының жағалауында қатты бұршақ жауып, 500-ден астам автокөлікке зақым келген. Табиғаттың тосын мінезінен болған залалдың жалпы сомасы 280 млн теңге көлемінде, деп хабарлайды F16.kz порталы kursiv.media—ға сілтеме жасап.
«Евразия» сақтандыру компаниясының мәлімдеуінше, зардап шеккен азаматтардың жартысы бүгінде өтемақыларын алған.
Компанияға көлік құралын ерікті сақтандырған (КАСКО) адамдардан 21 өтініш түсті, оның 14-і бүгінде жалпы сомасы 7,8 млн теңге сақтандыру төлемін алды. Темір тұлпар иелеріне төленген орташа төлем 556 мың теңге, сондай-ақ ең төменгі сома 137 мың теңге болса, ең жоғарысы – 1,78 млн теңге, – деп хабарлады команияның баспасөз қызметі.
Естеріңізде болса, биылғы шілде айында Шығыс Қазақстан облысының Бұқтырма су қомасы жағалауында құстың жұмыртқасындай көлемде бұршақ жауып, демалыс базаларына келген көліктердің әйнегін шағып, төбесін, капоты мен жүк салғышын майыстырған. Бұдан бөлек бұршақ үйлердің әйнегі мен шатырын бүлдіріп, бау-бақшаны тып-типыл қылған.
