Биыл ШҚО-да жол-көлік оқиғаларының саны күрт өскен. Бұл туралы облыстық прокуратура мәлім етті, деп хабарлайды F16.kz.
2023 жылы өңірде 443 жол апаты тіркелсе, былтыр бұл көрсеткіш 847-ге өскен. Ал осы жылдың басынан бері 1 093 жол-көлік оқиғасы болды. Кейінгі үш жылда 133 аса ауыр жол апатынан 180 адам көз жұмған.
Облыс прокуратурасы апаттардың 87%-ы жеңіл көлік жүргізушілерінің кінәсінен болғанын айтады.
Жол апатынан көз жұмғандар арасында 52 жүргізуші, 89 жолаушы, 34 жаяу жүргінші және 2 велосипедші бар. Оның ішіндегі бала саны – 22. Жолда 119 ер адам мен 58 әйел мерт болды. 94 ата-ананың қазасынан кейін 179 бала жетім қалды, — делінген ақпаратта.
Негізінен қайғылы жол апатына жылдамдықты рұқсат етілген шектен асыру, қарсы жолаққа шығу, маневр жасау ережелерін өрескел бұзу, жаяу жүргіншілерге жол бермеу және жүргізушілердің салғырттығы себеп болатын көрінеді
Содай-ақ ішімдік ішіп рөлге отыратындар аз емес. Мәселен, 17 мас жүргізушінің кесірінен 21 адам, соның ішінде 1 бала көз жұмған. Бұл істер бойынша 59 адам сотталды. Биылдың өзінде мас күйде көлік жүргізген 1 160 жүргізуші жауапқа тартылып, оның 75-іне қатысты қылмыстық іс қозғалды.
Біздің мақсат – жолдағы заңбұзушылыққа мүлде төзбеу қағидатын қалыптастыру. Егер сіз тәртіп бұзушылықты көрсеңіз, бейжай қалмаңыз. Сол арқылы біреудің өмірін сақтап қалуыңыз мүмкін, — дейді ШҚО прокуратурасының қоғам мүддесін қорғау басқармасының аға прокуроры Рауан Сайранбекұлы.
