Шығыс Қазақстан облысы Полиция департаментінің мамандары Дүниежүзілік қан доноры күніне орай ұйымдастырылған акцияға қатысты, деп хабарлайды F16.kz тілшісі Polisia.kz сайтына сілтеме жасап.
Атап айтсақ, тәртіп сақшылары Шығыс Қазақстан облыстық қан орталығында «Қан тапсырыңыз – үміт сыйлаңыз. Бірге өмір сақтаймыз!» деген ұранмен ұйымдастырылған қайырымдылық акциясына қатысты.
Іс-шара барысында донорлықты өмір салтына айналдырған, қайырымдылықты отбасылық дәстүр еткен жандар ерекше құрметке ие болды.
Мәселен, «Махаббат пен мейірімнің күші» номинациясы бойынша ШҚО ПД тәрбие және кадр басқармасының бастығы Марат Баяндинов пен жары Мейрамгүл Жүнісханқызы марапатталды. Олар – бір-біріне ғана емес, осындай игі іс арқылы өзге жандарға да қол ұшын соза білген абзал жандар. Әрқайсысы 30-дан астам рет қан тапсырған олар 200-ден астам адамға үміт пен өмір сыйлапты.
– Бұл – жүректен тамған жан жылуы, адамға деген сүйіспеншілік пен қамқорлықтың көрінісі. Баяндиновтар отбасы өз істері арқылы жақсылық жасаудың үлкені-кішісі жоқ екенін, бастысы – бейжай қалмай, қолдан келген көмекті аямау керектігін дәлелдейді, – деп жазады дерек көзі.
