Президент Қасым-Жомарт Тоқаев ұстаздардың Республикалық тамыз конференциясына қатысып жатыр. Биылғы жиын «Білім келешегі: адал азамат, кәсіби маман» тақырыбына арналады, деп хабарлайды F16.kz Ақордаға сілтеме жасап.
Мемлекет басшысы соңғы екі жылда өскелең ұрпақтың құқығын қорғау үшін нақты шаралар қабылданғанын атап өтті.
Зорлық-зомбылыққа, әлімжетікке, яғни буллингке, қатігездік пен озбырлыққа мүлде жол берілмеуі керек. Соңғы екі жылда өскелең ұрпақтың құқығын қорғау үшін нақты шаралар қабылданды. Атап айтқанда, кәмелет жасына толмағандарға қатысты жасалған кез келген зорлық-зомбылық үшін берілетін жаза қатайды, бала құқықтары жөніндегі уәкілдің құзіреті кеңейді, — деді ел Президенті.
Сондай-ақ қазіргі таңдағы ең өзекті мәселелердің бірі — балалардың өз-өзіне қол жұмсау жағдайлары туралы да сөз қозғалды.
Балалардың өз-өзіне қол жұмсау жағдайларының, яғни суицидтің алдын алу бойынша жүйелі жұмыс істеліп жатыр. Еліміздегі барлық мектепте «111» психологиялық қолдау қызметінің QR-коды орнатылды. Жаңа оқу жылынан бастап мектептер мен колледждерде әлімжеттікке, буллингке қарсы «ДосболLIKE» атты бағдарлама іске қосылады. Негізгі мақсат – балалар мен жеткіншектер арасындағы зорлық-зомбылықтың алдын алу. Бұл бағыттағы маңызды жұмыс тоқтамайды, жасөспірімдердің құқығы мен мүддесін қорғау мәселесі әрдайым мемлекет назарында болады. «Не ексең, соны орасың» деген. Қазір біз бір қоғам болып жас ұрпақтың бойына қандай құндылықтарды сіңірсек, ертең ондаған жылдан кейін ұлтымыздың сапасы да сондай болмақ. Әділетті, Озық, Таза, Қауіпсіз және Қуатты Қазақстанның іргесі мектепте қаланады, — деді Қасым-Жомарт Тоқаев.
