15 маусымнан облыстың Катонқарағай, Үлкен Нарын және Шемонаиха аудандарында жыл сайынғы «Қонақжай отбасы» жобасы басталды, деп хабарлайды F16.kz.
Риддер қаласынан, Шемонаиха, Тарбағатай және Зайсан аудандарынан келген жобаға қатысушыларды «Ақниет» мектеп-интернатының базасында құшақ жая қарсы алды. Кездесуді Абай атындағы Шығыс Қазақстан гуманитарлық колледжінің еріктілері ұйымдастырды.
Қатысушыларға қонақжай отбасыларына орналасу және тұру әдептері туралы кеңестер берілді. Еріктілер қатысушыларды бір-бірімен таныстыруға және достық атмосфераны құруға бағытталған іс-шаралар ұйымдастырды.
Жобаның алғашқы күндеріндегі жарқын флешмоб қатысушыларға ерекше көңіл-күй сыйлады. Бағдарламада тақырыптық әңгімелер, зияткерлік ойындар, бос уақытты тиімді өткізуге бағытталған іс-шаралар да болды.
Волонтерлердің жұмысы жобаға қатысушылар баратын ауылдық елді мекендерде жалғасады. Еріктілер бағдарламаны тиімді іске асыруға ықпал ете отырып, қатысушыларға жан-жақты қолдау көрсететін болады.
Жалпы, биылғы Шығыс Қазақстан облысында жобаға 140 оқушы қатысады деп жоспарланып отыр.
