Маусымның 12-сінен 13-іне ауған түні Израиль Иранды бомбалады. Осы оқиғаға байланысты Қазақстанның Израильдегі елшілігі шұғыл мәлімдеме жасады, деп хабарлайды F16.kz.
Әуе шабуылынан Тегеран (Иран астанасы – ред.) маңындағы бес-алты әскери нысан қираған. Ауқымды операцияның мақсаты – Иранның ядролық бағдарламасына қатысты нысандар. ЦАХАЛ (Израиль қорғаныс армиясы) дерегінше, Иранның иелігінде аз уақытта 15 ядролық оқтұмсық жасауға жететін байытылған уран қоры бар. Израиль тарапы мұны ұлттық қауіпсіздікке төнген қауіп деп бағалап отыр.
Таяу Шығыстағы жағдайдың ұшығуына байланысты Қазақстанның Тель-Авивтегі елшілігі Израильдегі қазақстандықтарға Тыл қолбасшылығының нұсқауларын (https://www.oref.org.il/ru) сақтауға, қауіпсіздік шараларын барынша күшейтуді, сақ болуды, соңғы жаңалықтарды қадағалап отыруды, сондай-ақ елшілікпен байланыста болуды сұрайды.
Қазақстанның Израильдегі елшілігінің байланыс нөмірлері:
+972 (3) 503 78 85 (кезекші)
+972 53 635 19 83 (ұялы телефон, WhatsApp)
+972 55 273 38 13 (ұялы телефон, WhatsApp)
+7 700 111 31 96 (WhatsApp)
CNN дерегінше, Тель-Авив Иран тарапынан қарымта соққы болады деп болжап отыр және ол өте жойқын болуы мүмкін. Израильде төтенше жағдай жарияланып, Қарулы күштер толық жауынгерлік дайындыққа көшті.
