Қазақстанда Amazon спутниктік интернеті қосылуы мүмкін. Бұл туралы Цифрлық даму, инновациялар және аэроғарыш өнеркәсібі министрі Жаслан Мәдиев айтты, деп хабарлайды F16.kz.
Аmazon компаниясының Project Kuiper спутниктік интернет қызметін 2027 жылы қолданысқа енгізу көзделген.
Ведомство басшысының айтуынша, бұл тек спутниктік интернет емес, жаһандық логистика, бұлтты технологиялар мен байланыс салаларын біріктіретін ауқымды стратегияның бір бөлігі болмақ. Нәтижесінде Қазақстанның шалғай және инфрақұрылымы нашар өңірлерін сапалы әрі тұрақты интернетпен қамтамасыз етуге мүмкіндік туады.
Қалалар мен облыс орталықтарында 5G енгізу нәтижесінде елдегі ұялы байланыс дамып келеді. Халықаралық серіктестермен спутниктік интернет-жобалар іске қосылып, транзиттік талшықты-оптикалық байланыс желілері де жүзеге асырылуда. Қазақстанның цифрлық хаб ретіндегі рөлі нығая түсті, – деді Жаслан Мәдиев Үкімет отырысында.
Мамандардың пікірінше, спутниктік ғаламтор желісін іске қосу елдегі бизнестің, білім беру, денсаулық сақтау және басқа да салалардың дамуына оң әсер етеді.
Ашық дереккөздердегі ақпаратқа сүйенсек, Project Kuiper бағдарламасы кейінгі жылдары қарқынды дамып келеді. Kuiper тобының орбитадағы спутниктер саны 120-дан асқан. Жобаның корпоративтік клиенттерге арналған антеннасына жүргізілген соңғы сынақтар интернет жылдамдығы 1 Гбит/с-тен асқанын, ал кідіріс небары 48 мс болғанын көрсетті.
