Күршім ауданында елді мекендерді ауызсумен және жылумен қамту мәселелері біртіндеп шешімін тауып келеді. Бүгін ауданға жұмыс сапарымен барған Шығыс Қазақстан облысының әкімі Нұрымбет Сақтағанов осылай деді, деп хабарлайды F16.kz.
БАРАҚ БАТЫР МЕН КҮРШІМ АУЫЛДАРЫНДА ЖҰМЫС ҚЫЗЫП ТҰР
Күршім ауданының халқымен кездесу барысында облыс әкімі Нұрымбет Сақтағанов ауданның барлық елді мекені орталықтандырылған ауызсумен қамтамасыз етілгенін атап өтті. Сонымен қатар өңірде инженерлік желілерді жаңғырту және салу жұмыстары жалғасуда. Осы ретте қазіргі уақытта жалпы құны 7 миллиард теңгенің екі ірі жобасы жүзеге асырылып жатқанын айту керек.
Оның біріншісі – Барақ батыр ауылындағы су құбыры желілерінің құрылысы. Биыл аталмыш жоба аясындағы жұмыстарға 131,6 миллион теңге қарастырылған екен. Жобаны аяқтау мерзімі – 2025 жыл.
Сондай-ақ, аудан орталығы Күршім ауылындағы су құбыры желілерін қайта жаңғырту жұмыстары да қызып тұр. 2025 жылғы құрылыс жұмыстарына 208,4 миллион теңге бөлінген. Жоба 2026 жылы аяқталады деп жоспарланып отыр.
ТАҒЫ БІР ҚАЗАНДЫҚТЫ ҚАЛПЫНА КЕЛТІРМЕК
Облыс басшылығы Күршім ауылындағы көппәтерлі тұрғын үйлер мен әлеуметтік нысандарды жылумен қамтамасыз ету мәселесіне де ерекше мән беріп отыр. 2023 жылдан бастап мұндағы жылу көздері мен жылу желілерін жаңғыртуға 1,3 миллиард теңге бөлінген. Нәтижесінде, қазіргі кезде 8 көпқабатты тұрғын үй (170 пәтер) және 8 әлеуметтік нысан орталықтандырылған жылу жүйесіне қосылған.
Ал ағымдағы жылы облыстық бюджеттен тағы 220,2 миллион теңге бөлініп, үш жоба бойынша жұмыстар жалғасуда. Бұдан бөлек, Күршім ауылында 1960 жылы салынған, бірақ қазіргі уақытта жұмыс істемей тұрған №6 қазандықты қалпына келтіру мәселесі қарастырылып жатыр.
– Бұл нысанды қайта жаңғырту үшін 286,5 миллион теңге қажет. Егер жоба жүзеге асса, тағы 8 көпқабатты тұрғын үй мен 3 әкімшілік ғимаратты орталық жылу жүйесіне қосу мүмкіндігі туады, – деді облыс әкімі халықпен кездесуде.
